Documentación fotográfica Ben Interese Cultural de Galicia

No segundo semestre de 2023, conseguimos participar en dous lotes dunha licitación da Dirección Xeral de Patrimonio Cultural da Consellería de Cultura da Xunta de Galicia para a dixitalización de Bens de Interese Cultural privados e pertencentes a outras administracións.

O territorio que abarcaban os dous lotes foi moi amplo e diverso xa que un deles se correspondía coa Mariña Oriental, Os Ancares e Quiroga e o outro coas comarcas de O Carballiño, O Ribeiro, O Condado e Pontevedra.

Categorizaron os elementos protexidos en función da súa tipoloxía:

1ª categoría: incluía tanto as Paisaxes Culturais como os Conxuntos Históricos e Lugares de Valor Etnolóxico.

Tivemos a sorte de documentar lugares tan fermosos e complexos como as aldeas de Seceda e Froxán nos Ancares, o núcleos históricos de Ribadavia, Combarro, Pontevedra e Ribadeo e o Conxunto etnográfico das pallozas do Cebreiro.

2ª categoría: comprendía os bens da Lista do Patrimonio Mundial da UNESCO, os Sitios e Xardíns Históricos, as Catedrais, Mosteiros, Abadías e Conventos.

No noso caso, documentamos por exemplo os mosteiros de Oseira, de Lérez, de San Clodio e de Poio entre outros moitos bens.

3ª categoría: por último, estaban encadradas nesta terceira categoría os Castelos e Fortalezas, os Xacementos arqueolóxicos e aqueloutros BIC non especificados con anterioridade.

Realizáronse reportaxes de Bens de Interese Cultural moi diversos, xa que no noso listado había por unha parte numerosos castelos, castros, fortalezas, torres e xacementos arqueolóxicos, como os castelos de Doiras, Carbedo, Navia e Quindous; castros de Troña e Cervantes; ou o xacemento romano de Montefurado.